الدور التاني في مركز الاورام جامعه المنصورة
فيه #صيدلية التحضير الكيماوي
متوفر فيها اجهزة امريكية نيو اير افضل اجهزة تحضير عالمياIsolator Glove Box Safety cabinet
الجهاز الواحد تكلفته اكتر من ٦٠٠ الف جنيه
عندنا ٤ اجهزة في الدور التاني
لتحضير الجرعات في تعقيم تام ودقة وصيادلة كلينيكال الي ببحسبو الجرعات حسب الوزن والطول والبورتوكول المظبوط الي بيتحدد حسب المرض
وحسب التحاليل والاشعات للمرضى.
...
وفيه متابعه للحالات بعد العلاج ومتابعه التغذية المناسبة واي استشارات للاثار الجانبية للعلاج، وتوفر علاج فوري لاي تسريب بيحصل من الكيمو.
وكمان كل علاج ليه طريقة معينة للتحضير
تحضير العلاج الكيماوي مش مجرد يتحط في محاليل
للاسف طرق خاطئة جداا كانت بتتعمل زمان بتؤدي لتكسير الدوا ويبوظ او طرق تخزينه خاطئة
الوقتي كل دوا ليه طريقة تحضيره المعينة
سواء ادوية مينفعش تترج او تتهز والا تتكسر وترغي وبكدا ميبقلهاش اي لازمة زي الاسبارجينيز وهيرسبتن ومابثيرا و فاكتور ٨
وادوية تانية لو اتحفظت في التلاجة تترسب وتبوظ زي البلاتينول والجمزار
وادوية لو نزل المحلول على البودر علطول تعجن وتبوظ 
لازم يبقى على الجدار وتتلف بطريقة بسيطة وبالراحة جدا وتدوب بشويش
وادوية لازم تدوب برج عنيف على جهاز الشيكر على ٢٥٠ لفة في الدقيقة ولمدة ساعه زي الاندوكسان
والا لو مدابتش كويس مش هتجيب نتيجة وبالعكس تعمل مشاكل كبيرة جدا للمرضى 
.. زمان من ٧ سنين قبل الصيدلة كلينيكال التحضير مكنش كدا ولا كان بيدوب وادوية العلاج الموجه وليه طرقه وادوية العلاج المناعي
دا غير ادوية كتيير جداا ملهاش اخر محتاجة كتب
كل دا بنعمله في صيدلية التحضير الكيماوي..
دا غير التحضير الي قبل الجرعه وبيختلف حسب الدوا
وبعد الجرعه لو الدوا ممكن يسبب التهاب للاوردة.
وادوية لازم تتحفظ في درجة حرارة من ٢ ل ٨..
ومش اي دوا يتحط في اي محلول او اي كمية
كل نوع دوا ليه نوع المحلول المخصص ليه
دوا زي بلاتينول لو اتحط في جلوكوز يرسب ويموت العيان
لازم يتحط في محلول ملح ولازم كمية ١٠٠٠ مل و لازم ادوية تانية تتاخد معاه وبتتحسب الكمية
ودوا زي الهيرسبتن لازم في محلول ملحي ٢٥٠ مل
وادوية زي كاربوبلاتن وكامتو لازم جلوكوز وبكميات معينة والا الدوا يبوظ ويرسب وخطر جدا ع المرضى لو اتحط في اي حاجة
وادوية لازم نسبتها تبقى من0.2 to 0.4 mg per ml
يعني نحسب نسبتها لنسبة المحلول زي الفيبسيد ولازم محلول ملح
وادوية لازم تتاخد وريد مباشر فوري ومينفعش تتعلق في محاليل.
وادوية لازم على مدى ساعات معينة
نوع المحلول وكميته بيفرق جدااا بين كل علاج والتاني
وصلاحيته قبل وبعد التحضير..وطريقة تخزينه
وطريقة اعطاءه
كل دا كان عشوائي وغير منظم وغير صحيح قبل وجود صيدلية التحضير الكيماوي الي مسئول عنها صيادلة كلينيكال
ولا كانت بتمارس بالطريقة الصحيحة من قبل،
دا غير استخدام الvial accessودا بيحافظ على تعقيم الدوا وصلاحيته ويخلينا نحافظ على كل مل من الادوية
لان ادوية العلاج الكيماوي غالية جدااا ولازم نحافظ على كل نقطه فيها ونوفر الادوية لغير المحتاجين.
ونقلل هدر الدوا ومفيش ادوية بتترمي
ودا انجاز كبير خلانا نحافظ على ملايين الجنيهات الي كانت بتترمي زمان..بعد مجرد فتح العبوة
او انهم يحتفظوا بباقي الادوية في التلاجه والدوا مفتوح
ودا يبوظه لان مجرد فتح العبوة بيساعد على دخول البكتريا والدوا يبوظ
لكن الفيال اكسس هو تقنيه تمنع دخول اي هوا تماما للادوية فتحافظ على سلامته وصلاحيته لمدة تصل ل ١٠ ايام.
والاجهزة الي موجودة كمان مصممة باعلى تكنولوجيا عالمية
فيها ضغط سلبي (negative pressure)
بحيث يتم شفط كل الكيماوي لداخل الاجهزة فتحمي المرضى والطاقم الطبي والمرافقين من خطر الكيماوي
وفيها هيبافلترز HEFA FILTERSمن اعلى الفلاتر
لتمنع اي شوائب تدخل للجهاز تضر المريض وتعقيم عالي جداا
وكذلك تمنع خروج اي كيماوي ضار وخطر جدا ع الصحة...
الاجهزة دي بتتعقم بالماء المعقم والكحول المطهر يوميا
قبل التحضير واثناءه وبعده...كل نص ساعه بيتعقم.
والجرعات بتكون معقمة تماما لان مريض الاورام مناعته ضعيفه وبتقل جدا او تنعدم لمدة ١٠ ايام بعد الجرعه.
فبنضمن سلامة المريض، وسلامة المرافقين والطاقم الطبي كله الي فب المستشفى.
وبيتم تحضير يوميا على الاقل ٢٠٠حالة عيادة وداخلي اقسام باطني رجالي وحريمي وامراض دم واطفال.
وجهازين laminar flowبتقنية ال+ve pressure
وهو الضغط الايجابي الي بيطرد كل البكتريا لبرة ويحافظ على تعقيم المواد بداخل الجهاز
ودول جهازين لتحضير المضادات الحيوية لكل الاقسام ليضمن دقة الجرعه وتعقيمها التام لان المرضى مناعتهم بتكون ضعيفه جداا ولازم يتحسب الجرعه بالظبط حسب وزن وطول العيان وسنه ومرضه وتكوم معقمه.
#نبذة_سريعه_عن_دور_الصيادلة_كلينيكال_في_مركز_اورام_المنصورة
#مركز_الأورام_جامعة_المنصورة 
#أمل_يهزم_الألم